Bohol – Kumpiskado ng kapulisan ang isang .45 calibre na baril at ang tinatayang nasa 30 gramo ng hinihinalang shabu na nagkakahalaga ng Php204,000 sa isinagawang buy-bust operation sa Purok 3, Brgy. Cangawa, Buenavista, Bohol noong Miyerkules, Mayo 31, 2023.
Kinilala ni Police Captain Edcel Petacio, OIC ng Buenavista MPS, ang naaresto na si “Marlon”, 32, residente ng Brgy. Putting Bato, Buenavista, Bohol.
Ayon kay PCpt Petacio, dakong ala-1:15 ng madaling araw ng inilunsad ang operasyon ng Drug Enforcement Team ng Buenavista Municipal Police Station, Bohol Maritime Municipal Police Station, at 702nd Maneuver Company, Regional Mobile Force Battalion 7 na humantong sa pagkakadakip ng kanilang target at pagkakasamsam ng mga naturang ebidensya.
Nahaharap sa mga kasong paglabag sa RA 9165 (Comprehensive Dangerous Drugs Act of 2002) at RA 10591 (Comprehensive Firearms and Ammunition Regulation Act) ang suspek.
Ang matagumpay na operasyon ay indikasyon sa maayos at mahusay na pagbibigay katuparan ng kapulisan sa pagsusulong ng kampanya nito kontra ilegal na droga.
