Nagsagawa ng Dental Mission at School Outreach ang PNP Officers’ Ladies Club – Mountain Province Chapter sa Talubin Elementary School, Talubin, Bontoc, Mountain Province noong Pebrero 21, 2025.
Ang programa ay pinangunahan ni Dr. Celia B. Oydoc ng PNP Officers’ Ladies Club – Mountain Province Chapter, sa pakikipagtulungan sa DepEd Mountain Province, Mountain Province Police Provincial Office, at Bontoc Municipal Police Station.
Ang grupo ay nagbigay ng mga lecture tungkol sa oral health, tamang pagsesepilyo, pagkain at nutrisyon, anti-bullying, at pag-iwas sa krimen, nagsagawa ng mga dental check-up at aplikasyon ng fluoride sa ngipin ng mga batang mag-aaral, namahagi ng mga tsinelas, gamit pang-eskwela, at dental kits, nagbigay ng libreng gupit, at nagbahagi ng mga meryenda at pananghalian.
Naging benepisyaryo ang 67 mag-aaral sa sari-saring serbisyo na handog ng grupo na nagdulot ng ngiti sa kanilang mga mukha at nagbigay ng inspirasyon upang pagbutihin ang kanilang kalusugan at edukasyon.
Ang aktibidad ay nagpapakita ng dedikasyon ng PNP Officers Ladies’ Club – Mountain Province Chapter at mga kasosyo nito sa pagpapalaganap ng kamalayan sa kalusugan, kaligtasan, at pangangalaga sa komunidad, na kinikilala ang kahalagahan ng kooperasyon at suporta sa bawat isa upang makamit ang mas ligtas at malusog na kapaligiran para sa mga mag-aaral at guro.
