Arestado ng awtoridad ang isang dating Persons Deprived of Liberty (PDL) sa isinagawang drug buy-bust operation sa Caimito Road, Barangay San Jose, Puerto Princesa City nito lamang ika-14 ng Nobyembre 2024.
Kinilala ng Police Station 2 at PDEA Palawan ang suspek na si alyas “Bong”, 51 anyos, may asawa, dating PDL at residente ng Barangay San Manuel.
Isang pulis ang nagpanggap na buyer ang nakipagtransaksyon sa suspek. Nabili sa suspek ang isang sachet ng hinihinalang shabu, kapalit ang pera na ginamit bilang buy-bust money.
Nakuha rin kay “Bong” ang dalawang piraso ng sachet ng hinihinalang shabu at iba pang drug paraphernalia.
Nahaharap ang suspek sa kasong paglabag sa Republic Act 9165 o “Comprehensive Dangerous Drugs Act of 2002”.
Ang operasyong ito ay tanda lamang na ang kapulisan ay patuloy sa kanilang adhikain na wakasan ang paglaganap ng ilegal na droga at pagbuwag sa kanilang mga operasyon upang magkaroon ng ligtas at mapayapang komunidad.
Source: XFM Palawan Broadcasting Network
Panulat ni Patrolwoman Ana Rose D Guadaña
