Arestado ng mga otoridad ang isang dating Medical Staff ng Communist Terrorist Group at tinuturing na National Most Wanted Person (MWP) sa Purok 9, Barangay Poblacion, Alabel, Sarangani Province nitong Abril 1, 2024.
Kinilala ni Police Brigadier General Percival Augustus P Placer, PRO 12 Regional Director, ang suspek na si alias “Commander Jinky”, 50 anyos, residente ng Barangay J.P Laurel, Panabo City, Davao Del Norte na may patong sa ulo na Php1,200,000 at nasa listahan ng DILG National Most Wanted Person.
Ayon kay PBGen Placer, matagumpay na naaresto si Commander Jinky makalipas ang ilang taong pagtatago dahil sa bisa ng Warrant of Arrest sa kasong murder.
Dagdag pa, ang suspek ay dating Medical Staff ng teroristang grupo mula sa Guerilla Font-TALA ng Far South Mindanao Region na kasama sa pagpaslang kay Vicente Villarosa noong Agosto 16, 2002, sa Purok 10, Barangay Spring, Alabel, Sarangani Province.
Ang pagkakahuli sa akusado ay bahagi ng mahigpit na pagpapatupad ng PNP laban sa mga teroristang grupo at sa mga wanted person upang mabigyang hustisya ang mga naging biktima ng mga ito at mapigilan sila upang hindi na makagawa pa ng krimen.
Panulat ni Patrolman Khnerwin Jay A Medelin
