Cotabato City – Patay ang dating City Director ng Cotabato City Police Office matapos barilin habang sugatan naman ang kasama nitong pulis sa Sinsuat Avenue, Mother Brgy. Rosary Heights, Cotabato City nitong Sabado, Marso 19, 2022.
Kinilala ni Police Major Elexon Bona, Chief of Police, Police Station 2, Cotabato City Police Office ang mga biktima na sina Retired Police Colonel Rolen Dela Cruz Balquin, Public Safety Officer ng Cotabato City, 60, at residente ng 1st Road, Kutangbato Subdivision, Barangay Rosary Heights 7, Cotabato City at ang kasama nitong si Police Chief Master Sergeant Ariel Bajao Gutang, 47, residente ng Notre Dame Village, Brgy. Rosary Heights 8, Cotabato City.
Ayon kay PMaj Bona, dadalo sana sa isang ceremonial opening ng Milk tea house ang mga biktima at habang sila ay nakasakay sa isang kulay pulang Mitsubishi Adventure na may plakang SAA 8844 ay bigla na lamang silang nilapitan at pinagbabaril ng hindi pa nakikilalang mga suspek.
Ayon pa kay PMaj Bona, nagtamo ng maraming tama ng bala sa iba’t ibang bahagi ng katawan at ulo si Ret. PCol Balquin habang nagtamo naman ng tama sa kanyang tiyan ang kasama nitong si PCMS Gutan.
Matapos ang insidente, agad na tumakas ang mga suspek sakay ng kanilang get-away na motorsiklo.
Dali-dali namang dinala sa Cotabato Regional and Medical Center ang dalawang biktima ngunit idineklarang dead on arrival si Ret. PCol Balquin.
Narekober sa pinangyarihan ng krimen ang sampung fired cartridge case ng 45 caliber pistol habang tatlong piraso ng fired bullets at isang cartridge case ng parehong kalibre ang narekober sa loob ng sasakyan ng mga biktima.
Samantala, patuloy ang isinasagawang imbestigasyon at hot pursuit operation ng Cotabato City Police Office sa nasabing insidente para sa agarang pagkakadakip sa suspek.
###
Panulat ni Patrolman Charlie Nasroden Corpuz III
