Oriental Mindoro – Timbog ang isang dating Barangay Police sa isinagawang buy-bust operation ng mga tauhan ng Puerto Galera Municipal Police Station sa Brgy. Sto. Nino, Puerto Galera, Oriental Mindoro noong ika-31 ng Enero 2023.
Kinilala ni Police Captain Kim Badillo, Acting Chief of Police ng Puerto Galera MPS, ang suspek na may alyas na “John”, 43, residente ng Barangay Aninuan, Puerto Galera, Oriental Mindoro.
Ayon kay PCpt Badillo, naaresto ang suspek sa isinagawang buy-bust operation ng pinagsanib na puwersa ng Puerto Galera MPS kasama ang Oriental Mindoro Provincial Drug Enforcement Unit.
Ayon pa kay PCpt Badillo, nakuha mula sa suspek ang isang sachet na naglalaman ng pinaghihinalaang shabu kapalit ng halagang Php500, dahilan upang siya’y arestuhin ng mga otoridad.
Kumpiskado din sa kanya ang dalawa pang sachet na naglalaman ng pinaghihinalaang shabu, apat na pirasong transparent plastic sachet, pakete ng sigarilyo, cellphone at ang gamit nitong motorsiklo.
Ang suspek ay kasalukuyang nahaharap sa kasong paglabag sa Section 5 at 11 ng Republic Act 9165 o kilala bilang “Comprehensive Dangerous Drugs Act of 2002.”
Ang PNP ay hindi titigil sa paglaban sa mga may pagkakasala sa batas at iba pang ilegal na aktibidad para manatiling ligtas at maayos ang komunidad.
Panulat ni Patrolman Erwin Calaus
