Dinakip ng mga awtoridad ang dalawang foreigner na pansamantalang naninirahan sa El Nido, Palawan dahil sa nakitang aktong pagkakabit ng skimming device sa isang Automated Teller Machine (ATM) sa bayan ng El Nido, Palawan nito lmang ika-21 ng Marso 2025.
Kinilala ang mga suspek na sina alyas “Stan”, 30 taong gulang, delivery rider, tumutuloy sa isang hotel, at isang alyas “Daniel”, 36 taong gulang, pansamantalang naninirahan sa Barangay Maligaya at kapwa Romanian Nationals.
Sa imbestigasyon ng El Nido Municipal Police Station (MPS), nagtungo sa kanilang istasyon ang isang alyas “Joy”, bank technician na umano’y aktong nakakita sa dalawa na may ikinakabit sa Atm na kanya sanang i-inspeksyunin.
Agad umano niyang kinompronta ang dalawa na dali-daling inalis ang ikinabit na aparato na may kakayanang magbasa ng mga detalye sa mga Atm cards.
Nang madakip sa follow-up operation, nakuha sa mga Romanians ang isang gray sling bag na naglalaman ng skimming device, black wallet, limang (5) piraso ng Buono carburate 100 euro cards, (11) piraso ng Buono carburate 150 euro cards, driver’s license, Php24,000 cash at iba’t ibang mga gamit.
Nasa pangangalaga na ng El Nido MPS ang mga banyaga na mahaharap sa kasong paglabag sa Republic Act 8484 o “Access Devices Regulation Act of 1998”.
Source: The Palawan Times
