Dalawang Most Wanted Person sa lalawigan ng Rizal ang naaresto ng Rizal Police sa magkahiwalay na operasyon noong Hunyo 9, 2025.
Unang naaresto si alyas “Ado”, 57 taong gulang, artist at residente ng Barangay San Vicente, Angono. Nasakote siya ng Angono MPS sa bisa ng Warrant of Arrest sa kasong paglabag sa RA 7610. May piyansa itong Php200,000. Ayon sa ulat, Pebrero 2024 nang mangyari ang insidente sa 17-anyos na biktima, na sapilitang isinama at inabuso umano ng suspek.
Kasunod nito, bandang alas 10:15 ng umaga, naaresto naman si alyas “Rey”, 55, construction worker at Rank No. 9 Most Wanted ng Rizal, sa Barangay San Jose, Rodriguez. Inaresto siya ng Rodriguez MPS sa bisa ng warrant para sa kasong Acts of Lasciviousness na may piyansang Php180,000. Siya ay umano’y live-in partner ng lola ng biktima at minolestiya ang menor de edad noong Oktubre 27, 2024.
Patuloy ang kampanya ng Rizal PNP laban sa kriminalidad upang mapanatiling ligtas at payapa ang komunidad.
Source: Rizal PPO
Panulat ni Joeana-May C Rosario
