Eastern Samar – Dalawang miyembro ng Communist Party of the Philippines-New People’s Army (CPP-NPA) ang sumuko sa 1st Eastern Samar Provincial Mobile Force Company noong Miyerkules, Mayo 25, 2022.
Kinilala ni Police Lieutenant Colonel Joy Leanza, Acting Force Commander ng 1st Eastern Samar PMFC ang mga sumuko na sina alyas “Ka Ebir/Jeron/Janjan”, nasa tamang edad, may live-in partner, isang magsasaka at residente ng Barangay Rizal, Dolores, Eastern Samar; at alyas “Ka Ogis”, 25, binata, walang trabaho at residente ng Brgy. San Pascual, Dolores, Eastern Samar.
Ayon kay PLtCol Leanza, ang kanilang pagsuko ay resulta ng malawakang pagsisikap sa pagpapatupad ng Executive Order No. 70 o ng National Task Force to End Local Communist Armed Conflict (NTF-ELCAC).
Kasabay ng kanilang pagsuko ang pagbabalik ng isang unit na caliber 9mm pistol na may magazine at isang unit ng fragmentation grenade.
Nagpasya ang nasabing mga surrenderees na bumalik sa kamay ng batas nang mapagtantong sila ay dinaya lamang ng matatamis na kasinungalingan at pekeng ideolohiya ng armadong grupo.
Dagdag pa rito, malaki ang kanilang pag-asa nang lumapit sila sa mga otoridad dahil sa mga programa ng gobyerno.
Tinutuligsa at mariing kinukondena ngayon nina Ka Ebir at Ka Ogis ang CPP-NPA.
Ang nasabing mga surrenderees ay nasa ilalim ng pansamantalang proteksyon ng 1st ESPMFC habang hinihintay ang pag-apruba ng nararapat na benepisyo ng Enhanced Comprehensive Livelihood Program (E-CLIP).
Mensahe ni PLtCol Leanza, 24/7 open ang kanilang opisana para sa mga handang sumuko.
Ang 1st Eastern Samar PMFC ay walang humpay sa pagsisikap sa kampanya laban sa insurhensya.
###
Panulat ni Rialyn B Valdez
