Bagumbayan, Sultan Kudarat – Boluntaryong sumuko ang dalawang miyembro ng Communist Terrorist Group matapos ang masigasig na panghihikayat ng PNP at mga kawani ng gobyerno ng Sultan Kudarat sa Purok Malinawon, Biwang, Bagumbayan, Sultan Kudarat noong Mayo 25, 2022.
Kinilala ni Police Major Ronalyn Domider, Chief of Police ng Bagumbayan Municipal Police Station, ang dalawang Former Rebel (FR) na sina alyas “Ricky”, 20, at si alyas “Lawin”, 28, parehong miyembro ng Squad 2, Platoon My Phone, Guerilla Front (GF) Daguma, Far Southern Mindanao Region (FSMR) at pawang residente ng Sitio Datal Bonlangon, Brgy. Ned, Lake Sebu, South Cotabato.
Ayon kay PMaj Domider, nagbalik-loob sa pamahalaan ang dating mga rebelde sa tulong ng mga tauhan ng Police Regional Office 12, Philippine Army at pamahalaan ng Sultan Kudarat.
Ayon pa kay PMaj Domider, kabilang sa kanilang pagsuko ay kanila ding tinukoy si alyas “Macmac” (TNU), Commander ng Platoon My Phone ng GF Daguma, FSMR at si Felimon Villegas alyas Kumander Yoyo, PO ng GF Daguma, FSMR na siyang nangangasiwa sa mga tri-boundary sa lugar ng Bagumbayan at Senador Ninoy Aquino kapwa sa Sultan Kudarat at Lake Sebu, South Cotabato.
Ayon pa kay PMaj Domider, sangkot si Ricky sa isang engkwentro laban sa 33rd at 27th Infantry Battalion, Philippine Army sa Sitio Datal Bonglangon, Brgy. Ned, Lake Sebu, South Cotabato noong Disyembre 3, 2017. Habang si Lawin naman ay sangkot sa insidente ng harassment sa CAFGU Detachment sa Sitio Tuburan, Brgy. Ned, Lake Sebu, South Cotabato noong taong 2015.
Dagdag pa ni PMaj Domider, ang dalawang FR ay kasalukuyang nasa Camp Fermin G. Lira, General Santos City para sa tamang disposisyon at nakatakdang sumailalim sa Enhanced Comprehensive Local Integration Program (E-CLIP).
Muli, hinihikayat ng PNP ang mga pinuno, aktibong miyembro at mga sumusuporta sa mga CTG na magbalik-loob na sa ating pamahalaan upang makamit nila ang tunay na serbisyo at ang tulong na inaalok ng gobyerno sa pamamagitan ng E-CLIP at upang tulungan silang bumuo ng bago at normal na buhay kasama ang kanilang mga mahal sa buhay.
###
Panulat ni Patrolman Gio Batungbacal
