Tantangan South Cotabato – Timbog ang dalawang lalaki matapos mahuli sa akto ng mga otoridad na nagpa-pot session sa isang sementeryo sa Purok 2, Brgy. San Felipe, Tantangan, South Cotabato nitong Lunes, Hunyo 27, 2022.
Kinilala ni Police Major Randy Apostol, Officer in Charge ng Tantangan Municipal Police Station, ang mga naarestong suspek na sina Bryan Castro y Rendon, 37, at si Arnel Fava y Babor, 41, na pawang mga residente ng Koronadal City, South Cotabato.
Ayon kay PMaj Apostol, nakatanggap ng tawag ang kanilang istasyon mula sa isang concerned citizen na mayroong dalawang lalaki na kasalukuyang nagpa-pot session sa loob ng nasabing sementeryo. Agad na nagtungo ang kapulisan mula sa Tantangan MPS kasama ang 1205th MC, RMFB 12 upang kumpirmahin ang nasabing ulat.
Pagdating ng rumespondeng grupo sa sementeryo, nahuli sa akto sina Castro at Fava na kasalukuyan ngang nagpa-pot session.
Agad silang inaresto at narekober sakanila ang dalawang pakete ng hinihinalang dried marijuana leaves na may timbang na 70 gramo at tinatayang may presyo na Php18,400, kasama ang tatlong naka-rolyong dried marijuana leaves kung saan ang dalawa’y nagamit na.
Dinala sa South Cotabato Forensic Unit ang mga nakumpiskang ebidensya para sa kaukulang pagsusuri at mahaharap ang dalawa sa kasong paglabag sa RA 9165 o Comprehensive Dangerous Drugs Act of 2002.
Samantala, patuloy na paiigtingin ng PNP ang kampanya laban sa ilegal na droga katuwang ang iba pang ahensya ng gobyerno upang mapanatili ang maayos at ligtas na komunidad.
###
Panulat ni Patrolman Gio Batungbacal
