General Santos City – Huli sa akto ang dalawang lalaki na nagnanakaw ng niyog sa isang Coconut Farm sa Purok San Jose, Barangay Lagao, General Santos City nito lamang ika-13 ng Hunyo 2023.
Kinilala ni PCol Jomar Alexis Yap, City Director ng General Santos City Police Office, ang mga naarestong suspek na sina alyas “Renren” at alyas “Edrian” na pawang nasa wastong gulang at kapwa residente ng Barangay Baluan, General Santos City.
Batay sa ulat ng kapulisan ng GSCPO-Police Station 1, nireklamo ang dalawang suspek matapos silang mamitas ng bunga ng niyog ng walang pahintulot sa may-ari ng Coconut Farm.
Agad itong nirespondehan ng mga nakatalagang pulis sa barangay at inaresto ang dalawang suspek matapos silang madatnan na abala sa pangunguha ng niyog.
Samantala, nakuha naman mula sa mga suspek ang anim na buko. Kasong Qualified Theft naman ang isinampang reklamo laban sa mga suspek.
Pinuri naman ni City Director ang mga kapulisan ng PS 1 sa mabilis na pagresponde sa insidente at gayundin ang patuloy na pakikipagtulungan ng mamamayan na nagresulta sa agarang pagkakaaresto sa mga suspek.
Panulat ni Patrolman Khnerwin Jay A Medelin
