Paracale, Camarines Norte – Arestado ang dalawang lalaki sa isinagawang operasyon ng Paracale PNP na nagresulta sa pagkakakumpiska sa isang yunit ng baril sa Barangay Batobalani, Paracale, Camarines Norte nito lamang Oktubre 18, 2022.
Kinilala ni Police Major Fernand Segundo, Chief of Police ng Paracale MPS, ang mga suspek na sina alyas “Van”, 41, may asawa, isang minero, residente ng Purok 6, Barangay Tugos, Paracale at si alyas “Ai”, 22, binata, isang minero at residente ng Purok 1, Barangay Cagbalogo, Vinzons, Camarines Norte.
Ayon kay PMaj Segundo, bandang 12:55 ng tanghali ng inilunsad ang operasyon ng operatiba ng Paracale Municipal Police Station na nagresulta sa pagkakakumpiska sa isang yunit ng Caliber 45 pistol na may tatak na Shooters na may serial number na RO2050444 na kargado ng pitong (7) bala, isang piraso ng Php1,000 bilang buy-busy money at Php19,000 bilang boodle money.
Samantala, ang mga nasabing suspek pati na ang ebidensyang nakumpiska sa operasyon ay agad na dinala sa himpilan ng Paracale MPS para sa kaukulang disposisyon.
Mahaharap ang mga suspek sa kasong paglabag sa RA 10591 o ang Comprehensive Firearms and Ammunition Regulation Act.
Ang PRO5 ay patuloy sa mandato na tugisin ang mga taong sangkot sa ilegal na pagbebenta ng baril upang makamit ang kaayusan at kapayapaan tungo sa ikakapanatag ng pamayanan.
Source: Camarines Norte Police Provincial Office – Pulis Bantayog
