Arestado ang dalawang indibidwal matapos rumesponde ang mga tauhan ng Talomo Police Station katuwang ang Mines and Geosciences Bureau (MGB), City Environmental and Natural Resources Office (CENRO) at mga opisyal ng barangay Catalunan Grande matapos makatanggap ang naturang estasyon ng report ng ilegal na pagmimina sa Purok 41 Saavedra Relocation, Catalunan Grande, Davao City nito lamang Setyembre 17, 2024.
Kinilala ni Police Major Genesis P Oriel, Acting Station Commander ng Talomo Police Station, ang mga suspek na sina alyas “Victoriano”, 55 anyos, isang dumptruck driver at alyas “Dante”, 48 anyos, isang backhoe operator.
Ang mga nabanggit ay pawang residente ng Davao City.
Narekober mula sa mga ito ang dalawang backhoe at isang dump truck kasama na ang mga ignition key nito.
Agad namang dinala ang mga suspek sa Talomo Police Station upang dumaan sa tamang disposisyon at mahaharap sa kasong paglabag sa Republic Act 7942 o Philippine Mining Act of 1995.
Samantala, patuloy namang nagsusumikap ang Police Regional Office 11 upang maitaguyod ang batas at maprotektahan ang inang kalikasan at kapayapaan sa buong rehiyon ng Davao.
Panulat ni Pat Shairra Rose A Aquino
