Arestado sa isinagawang Anti-Illegal Drug Operation ng Northern Police District (NPD) ang dalawang High Value Individual (HVI) at nasamsam ang tinatayang Php360,000 halaga ng shabu sa Barangay Bagong Silang, Caloocan City nito lamang Sabado, Marso 8, 2025.
Kinilala ni Police Colonel Josefino Ligan, District Director ng NPD, ang mga suspek na sina alyas “Eddieboy”, 25-anyos na lalaki at isang 35-anyos na lalaki, kapwa mga residente ng Caloocan City.
Ayon kay PCol Ligan, naging matagumpay ang operasyon dahil sa pagsisikap ng NPD District Drug Enforcement Unit (DDEU) katuwang ang Philippine Drug Enforcement Agency (PDEA) at Caloocan City Police Sub-Station 12.
Nasamsam ng mga awtoridad sa mga suspek ang 53 gramo ng hinihinalang shabu na nagkakahalaga ng Php360,400 at ang ginamit na buy- bust money.
Sasampahan ang mga suspek ng kasong paglabag sa Sections 5 (Sale), 26 (Conspiracy), at 11 (Possession of Dangerous Drugs) sa ilalim ng Article II ng Republic Act 9165 o ang “Comprehensive Dangerous Drugs Act of 2002”.
Ang NPD ay hindi natitinag sa pangako sa maigting na kampanya laban sa droga, na binibigyang-diin na ang walang humpay na paglaban sa ilegal na droga ay nananatiling pangunahing priyoridad sa pagpapanatili ng isang ligtas na komunidad.
Source: NPD PIO
Panulat ni PMSg Rmeelin M Gargantos
