Arestado sa isinagawang buy-bust operation ng Provincial Drug Enforcement Unit (OPD-DEU) sa koordinasyon ng Batangas City Police Station (CCPS) ang dalawang High Value Individual sa Barangay Dumuclay, Batangas City bandang 2:15 PM ng ika-20 ng Agosto 2024.
Kinilala ni Police Colonel Jacinto R Malinao Jr., Acting Provincial Director ng Batangas PPO, ang mga suspek na sila alyas “Rommel”, 51 taong gulang, may asawa, isang mangingisda, at si alyas “Marco”, 29 anyos, may live-in partner, construction worker at kapwa mga residente ng Bauan at nakalista bilang High Value individual.
Nakumpiska sa pagmamay-ari ng mga suspek ang nasa humigit kumulang 330 gramo ng hinihinalang shabu na nagkakahalaga ng Php2,244,000.
Nakuha rin sa kanila ang isang unit ng Cal .45 pistol na may isang magasin at bala.
Nasa kustodiya na ngayon ng Batangas Police Provincial Office ang mga naarestong suspek para sa pagproseso at dokumentasyon at inihahanda na ang kasong paglabag sa Republic Act 9165 at RA 10591.
Nagpasalamat si PCol Malinao Jr. sa komunidad sa kanilang walang patid na suporta at pakikipagtulungan sa mga awtoridad. “Ang matagumpay na operasyong ito ay isang malaking dagok sa sindikato ng droga na nag-ooperate sa lalawigan. Patuloy nating paiigtingin ang ating pagsisikap na maalis ang ilegal na droga sa Batangas at matiyak ang kaligtasan at seguridad ng ating mga komunidad.”
Hindi tumitigil ang kapulisan lalo na ang Batangas PNP na paigtingin ang kampanya kontra kriminalidad upang patuloy na maisakatuparan ang mas maayos at mas ligtas na pamayanan tungo sa Bagong Pilipinas.
Source: Batangas PPO-PIO
Panulat ni Pat Maria Sarah P Bernales
