Dalawang miyembro ng Communist Terrorist Group ang kusang sumuko sa bayan ng Silay City, Negros Occidental at sa Sibalom, Antique nitong ika-19 ng Marso 2023.
Ang boluntaryong sumuko ay kinilalang si alyas “Ka Leon”, 60, residente ng Sitio Binulwangan, Guimbalaon, Silay City, Negros Occidental at dating miyembro ng Bayan Muna/KMU na nagsilbi bilang organizer at recruiter ng naturang grupo.
Isinuko din nito ang kanyang armas na isang yunit ng caliber .30 Rifle na may apat na bala, isang IED blasting cap material at isang 60mm mortar round.
Ayon kay PLtCol Edison Garcia, Force Commander ng 1st NOCPMFC, naging matagumpay ang pagsuko ni “Ka Leon” sa pinagsamang pagsisikap ng kanilang hanay kasama ang mga tauhan ng Silay CCPS, EB. Magalona MPS, Victorias CCPS, Charlie Company 79th IB 303rd Brigade, 1st MP 605th RMFB, Negros Occidental PIT at RIU6.
Sa probinsya naman ng Antique ay kusang sumuko sa Sibalom PNP si alyas “Baby Boy”, 21, isang laborer, miyembro ng Squad 2, Front 11, Southern Front Committee (SFC), Komiteng Rehiyon Panay (KRP) at residente ng Brgy. San Mateo Norte, San Joaquin, Iloilo.
Kasabay ng kanyang pagsuko ay ang pagturn-over nito ng kanyang armas na isang yunit ng .38 caliber revolver at isang yunit ng grenade explosive.
Sa tulong ng Sibalom Municipal Police Station kasama ang PNP Provincial Intelligence Unit (PIU), 1st Antique PMFC at Provincial Intelligence Team (PIT) ay naging matagumpay ang naturang pagsuko nito.
Ang PNP ay magpapatuloy na hikayatin ang mga natitira pang mga miyembro ng komunistang teroristang grupo para magbalik-loob sa ating pamahalaan upang mamuhay ng payapa kasama ng kanilang mga mahal sa buhay.
