Arestado sa sanib-pwersang operasyon ng Anti-Kidnapping Group (AKG) at Police Regional Office 4A (PRO4A) ang dalawang Chinese nationals na sangkot sa kasong Kidnapping sa Nasugbu, Batangas.
Kasama sa mga nabihag ay dalawang Chinese at isang Korean national, na dinukot sa Barangay Balaytigue, Nasugbu, Batangas noong madaling araw ng Mayo 2, 2025 ngunit pinalaya rin kinabukasan matapos ang negosasyon sa ransom.
Sa imbestigasyon, makikita sa surveillance footage at paglalahad ng mga biktima na ang nangyaring kidnap-for-ransom ay isang inside-job case.
Sumunod nang inaresto ng mga AKG operatives at tauhan ng PRO4A sa checkpoint sa Bacoor, Cavite noong ika-4 ng Mayo ang dalawang suspek na kinilalang sina Huang Yuze, 27 taong gulang, lalaki; at Zhao Li Shan, 29 taong gulang, lalaki – parehong Chinese nationals.
Nasamsam mula sa mga suspek ang isang .45 caliber pistol at isang 9mm handgun, kasama ang ilang basyo ng bala na ngayon ay bahagi ng mga ebidensya sa kaso.
Nahaharap ang mga suspek sa kasong kidnapping, illegal possession of firearms, at iba pang kasong kaugnay dito. Inihahanda na rin ang immigration-related charges sa pakikipag-ugnayan sa Bureau of Immigration.
Pinuri ni PNP Chief, Police General Rommel Francisco D. Marbil ang mabilis at mahusay na pagtugon ng kapulisan sa ikalulutas ng kaso.
“Ang mabilis na pagtugon na ito ay nagpapakita ng hindi natitinag na dedikasyon na protektahan ang lahat ng mamamayan sa loob ng ating bansa— Pilipino man o dayuhan. Maging malinaw sana itong babala sa mga sindikatong kriminal na ang Pilipinas ay hindi kailanman magiging kanlungan para sa mga transnational na krimen. Tutugon tayo nang may pagpapasiya, at papanagutin natin ang lahat ng nagkasala.”
Hindi patitinag ang PNP na sugpuin ang lahat ng mga indibidwal at grupong sangkot sa mga transnational crimes upang tiyaking mapanatili ang kapayapaan at seguridad sa buong bansa.
Photo Courtesy by Agila ng Bayan
