Hawak na ng mga awtoridad ang dalawang armadong lalaki matapos magsanhi ng kaguluhan sa Sitio Kabukugan, Barangay Poblacion, Sibonga, Cebu noong Mayo 11, 2025, bandang alas-9:55 ng gabi.
Ayon kay Police Captain Feb Abadilla Seares, Officer-In-Charge ng Sibonga Municipal Police Station, rumesponde sila sa isang trouble alarm at naabutan si PSSg Christopher Cuizon ng PDEG na nakatago sa isang sasakyan matapos umano’y paputukan ng mga sakay ng isang Hyundai Accent at motorsiklong NMAX. Nasa loob ng Accent ang isang kandidato sa pagka-konsehal at ilang opisyal ng barangay.
Habang ina-assess ang sitwasyon, natagpuan ang umano’y isang army reservist, na may dalang 9mm baril. Wala siyang maipakitang dokumento kaya agad siyang inaresto. Ilang metro mula sa pinangyarihan, isa pang lalaki ang nahuli na may dalang Glock 22. Pareho silang nahuling walang permit sa kanilang armas.
Narekober sa lugar ang iba’t ibang matataas na kalibreng baril, mga magasin, bulletproof vest, pera na aabot sa mahigit Php240,000, at listahan umano ng Command Vote Leaders.
Ang mga kapulisan ay patuloy na nagsusulong ng kaayusan at seguridad sa kanilang nasasakupan bilang bahagi ng adbokasiya para sa isang ligtas na Bagong Pilipinas.
