Cagayan de Oro City – Arestado ang dalawa sa tatlong suspek sa panggagahasa at pagpatay sa magkasintahan sa isinagawang Hot Pursuit Operation ng Cagayan de Oro City Police Office-Station 3 nito lamang ika-17 at 19 ng Hulyo 2022.
Kinilala ni Police Captain Ernesto Miranda Sanchez, Station Commander ng Cagayan de Oro City Police Office- Station 3, ang dalawang suspek na sina Erwin Adame, 34, residente ng Tabaco, Puntod, Cagayan de Oro City at Daniel Peligrino, 33, residente ng Saint John Puntod, Cagayan de Oro City.
Ayon kay PCpt Sanchez, naaresto si Adame bandang 10:30 ng gabi ng Hulyo 17 sa San Roque, Lapasan, Cagayan de Oro City matapos makatanggap ng report ang nasabing istasyon at personal na kinilala ng babaeng biktima na sumaksak kay Cris Sabaldana Semaña.
Samantala, naaresto naman si Peligrino bandang 4:30 ng hapon ng Hulyo 19, 2022 na personal na kinilala mismo ng babaeng biktima na ang suspek ang gumahasa sa kanya.
Habang nagpapatuloy naman ang paghahanap sa isa pang suspek ng mga awtoridad.
Ang Cagayan de Oro PNP ay patuloy na nagpupursige upang mahuli ang isa pang suspek upang mabigyan ng hustisya ang mga biktima at maprotektahan ang komunidad sa anumang uri ng kriminalidad.
###
Panulat ni Patrolman Edwin Baris/RPCADU 10
