Isang miyembro ng Communist Terrorist Group (CTG) ang nagbalik-loob sa pamahalaan sa bayan ng Piat, Cagayan nito lamang ika- 21 ng Disyembre taong kasalukuyan.
Pinangasiwaan ng Piat Police Station sa pangunguna ni Police Major Ranilo A Bumagat, Hepe ng nasabing istasyon, ang pagputol ng suporta ng miyembro ng CTG na si alyas “Densho”, 62 taong gulang, may asawa, isang manggagawa, at residente ng nasabing bayan.
Ayon kay alyas “Densho”, nagsimula siyang sumapi sa grupo noong 1980 sa edad na 19. Gayunpaman, naramdaman niya ang hirap sa loob ng organisasyon kaya’t nagdesisyon siyang lisanin ito matapos ang walong taon ng pagsapi upang makapamuhay ng tahimik kasama ang kanyang pamilya.
Kasabay ng kaniyang pagbabalik-loob ay isinuko rin nito ang isang homemade na 22 caliber na may limang bala. Sa kasalukuyan, ang suspek ay sumasailalim sa debriefing ng mga tauhan ng Piat Police Station.
Ang operasyon ay isang patunay ng patuloy na tagumpay ng mga hakbang ng pamahalaan laban sa mga armadong grupong terorista at ang pagpapakita ng suporta ng lokal na komunidad para sa kapayapaan at kaayusan sa rehiyon.
Source: Piat PS
