Tuluyang tinalikuran ng isang miyembro ng komunistang grupo sa Negros Oriental ang buhay na puno ng pasakit, matapos itong tumalima at sumuko sa mga miyembro ng 705th Maneuver Company (MC) ng Regional Mobile Force Battalion (RMFB) 7 nito lamang Biyernes, ika-18 ng Nobyembre 2022.
Ayon sa Force Commander ng RMFB 7, Police Lieutenant Colonel Ronan Claraval, kabilang ang sumuko sa pangkat ng SEF KR NCBS-D ng Rachel Mae Palang Command sa Santa Catalina, Negros Oriental.
Kasabay ng kanyang pagsuko, ay ang pagbibigay nito sa mga otoridad ng isang unit ng homemade shotgun.
Ang naganap na pagsuko at matiwasay na pagsasagawa nito ay resulta at bahagi ng mga hakbangin ng RMFB 7 upang lutasin at tuldukan ang problema sa insurhensiya sa lugar.
Bahagi ng makabuluhang tagumpay ay ang mga miyembro ng Negros Oriental Police Provincial Office (NOPPO), Regional Intelligence Unit (RIU) 7, at ng Regional Intelligence Division (RID) 7.
Pinuri naman ni Police Lieutenant Colonel Claraval ang 705th MC na pinamumunuan ni Police Lieutenant Donicko Angeles dahil sa kanilang husay at dedikasyon sa paggganap ng kanilang tungkulin para sa maayos at solidong resulta ng mga isinusulong na programa.
Tiniyak naman ng buong lakas ng RMFB 7 na kanilang pang pagbubutihin ang maayos at epektibong hakbangin upang tapusin ang problema sa terorismo sa rehiyon at maging sa lahat ng uri ng kriminalidad para sa mas ligtas, maayos, mapayapa at maunlad na komunidad.
Ang pagkakakilanlan ng sumuko ay minabuti namang hindi isiwalat para sa kanyang kaligtasan at kapakanan.
