Boluntaryong nagbalik-loob sa pamahalaan ang isang miyembro ng Communist Terrorist Group (CTG) sa mga kapulisan ng Sergio Osmeña Municipal Police Station katuwang ang Zamboanga del Norte Provincial Intelligence Unit, Regional Mobile Force Battalion 9, 1st at 2nd Zamboanga del Norte Provincial Mobile Force Company sa Barangay Paraiso, Mahayag, Zamboanga del Sur nito lamang ika-24 ng Enero 2025.
Kinilala ni Police Captain Dante B Tabotabo, Officer-In-Charge ng Sergio Osmeña MPS, ang sumuko na si alyas “Roland”, 48 anyos, babae, residente ng Barangay Paraiso, Mahayag, Zamboanga del Sur.
Ang sumuko ay dating miyembro ng CTG Legal Struggle sa ilalam ng Salabukan No’k Gtaw Subanen (SGS) at nagbalik-loob sa pamahalaan sa pagnanais na mamuhay ng maayos at tahimik kasama ang kanyang pamilya.
Kasabay ng kanyang pagbalik-loob ay isinurender nito ang isang unit ng improvise 12-gauge shotgun na walang markings at tatlong bala ng 12GA.
Agad naman itong nakatanggap ng cash assistance at food packs mula sa pulisya.
Sa ilalim ng programa ni Pangulong Ferdinand Marcos Jr., na naglalayong sugpuin ang insurhensiya, ang Pambansang Pulisya ay patuloy na hinihikayat ang mga natitira pang miyembro at tagasuporta ng CTGs na magbalik-loob sa pamahalaan at samantalahin ang programa nitong E-CLIP o Enhanced Comprehensive Local Integration Program at magkaisa tungo sa isang Bagong Pilipinas.
Panulat ni Pat Joyce Franco
