Cagayan – Boluntaryong sumuko ang isang 57 anyos na lalaki at dating miyembro ng Communist Terrorist Group sa Brgy. Caugingannan, Pamplona, Cagayan nito lamang ika-25 ng Mayo 2023.
Kinilala ni Police Captain Gemma Lummayung, Officer-In-Charge, Luna Municipal Police Station, ang sumuko na si alyas “Ka Alex”, may asawa, at residente ng Barangay Calayucay, Luna, Apayao.
Ayon kay PCpt Lummayung, matapos ang serye ng negosasyon at dayalogo na isinagawa ng pinagsamang operatiba ng Luna PNP, 1505th Regional Mobile Force Battalion 15 at Provincial Explosive and Canine Unit-Apayao ay naging matagumpay ang nasabing pag-uusap kung saan maayos na sinundo si “Ka Alex” sa Pamplona, Cagayan pauwi sa Apayao.
Kasabay ng pagbabalik-loob ay isinuko rin ni “Ka Alex” ang kanyang armas na isang unit ng Cal. 22 firearm na walang magazine at ammunition at isang unit ng cartridge 60mm High Explosives.
Samantala, isasailalim naman si “Ka Alex” sa proseso ng pag-enroll sa Enhanced Comprehensive Local Integration Program (E-CLIP).
Patuloy naman ang pagpapaigting ng Cordillera PNP sa programa kontra terorismo na “Dumanon Makitungtung” (Come to Talk to Villagers) upang hikayatin ang natitira pang miyembro ng makakaliwang grupo na talikuran na at bawiin ang suporta sa CPP-NPA-NDF tungo sa isang maayos, maunlad, mapayapang bayan.
