Camp Crame, Quezon City – Bumisita ang ama ng Pambansang Pulisya na si Police General Rodolfo S Azurin Jr sa PNP General Hospital nitong ika-23 ng Disyembre 2022 upang magbigay inspirasyon at mga regalo sa mga pasyenteng pulis na nagpapagaling sa nasabing pagamutan.
Kasama niyang nag-ikot at namahagi ng regalo sina Police Lieutenant General Rhodel O Sermonia, Deputy Chief PNP for Administration kasama ang iba pang mga senior officers mula sa national headquarters.
Samantala, nagpaabot din si General Azurin ng kanyang taos-pusong mensahe para sa mga pasyente, aniya, “Bilang ama ng Pambansang Pulisya, ang aking nais ngayong kapaskuhan ay makita ang inyong mga ngiti, lalong lalo na ang inyong agarang paggaling. In this season of hope, love and service, I wish each one of you all the best, good health, and continued success.”
Pinasalamatan rin niya ang lahat ng mga personalidad na bumubuo ng PNP General Hospital kabilang na ang lahat ng mga doctor, nurse, technical staff at ng iba pang mga tauhan sa Health Service, sa patuloy na pagbibigay ng kanilang hindi matutumbasang serbisyo hindi lang para sa mga pasyenteng pulis kundi para sa lahat ng nangangailangan ng agarang lunas.
“Sa lahat ng bumubuo ng PNPGH, ipagpatuloy lang natin ang ating mga magagandang gawain at tulong-tulong tayo para sa ikakabuti at ikakaganda pa lalo ng samahan natin sa organisasyon”, dagdag pa niya.
