Binigyang-liwanag ni Philippine National Police (PNP) Chief, Police General Rommel Francisco D. Marbil, ang publiko na ang ‘Revitalized Katok’ ay isang legal at maagap na hakbangin na naglalayong tiyakin ang responsableng pagmamay-ari ng baril — salungat sa mga sinasabing para sa pampulitikang kadahilanan.
“Ang Oplan Katok ay taunang inisyatiba upang matiyak na ang mga may baril ay sumusunod sa batas. Ito ay hindi, at hindi kailanman gagamitin para sa mga layuning pampulitika. Ipinapatupad lamang ng organisasyon ang Republic Act No. 10591 o ang “Comprehensive Firearms and Ammunition Regulation Act” na nag-oobliga sa napapanahong pag-renew ng mga lisensya ng baril,” pagbibigay-diin ni PGen Marbil.
Sa ilalim ng batas, kailangang i-renew ng mga may-ari ng baril ang kanilang License to Own and Possess Firearms (LTOPF) at rehistrasyon ng baril kada sampu o limang taon, depende sa kanilang napiling opsyon. Bilang pangunahing tagapangasiwa sa firearm ownership, ang hindi pagsunod ay maaaring magresulta sa pagkakumpiska at pagbawi ng kanilang pribilehiyo sa pagmamay-ari ng mga baril.
Binigyang-diin din ng Hepe na ang Revitalized Katok ay isang mahalagang bahagi ng pagsusumikap ng PNP, kung saan nagbabahay-bahay ang mga opisyal ng pulisya upang paalalahanan ang mga may-ari ng baril na mag-renew ng kanilang mga lisensya. Ang ganitong hakbangin ay nagtitiyak na ang mga lehitimong baril ay hindi mawawala o mahuhulog sa maling mga kamay. Isa rin ito sa pinakamahusay na gawi ng PNP sa accounting at pagpapaalala sa mga may hawak ng baril tungkol sa kanilang mga obligasyon sa ilalim ng batas.
“Ang layunin ay simple — panatilihing ligtas ang mga komunidad at maiwasan ang paggamit ng mga loose firearms sa mga krimen. Epektibong nabawasan ng programang ito ang bilang ng mga hindi rehistradong baril at potensyal na gun-related violence,” dagdag ni CPNP.
Samantala, bilang tugon sa mga alalahanin na ang ‘Revitalized Katok’ ay maaaring maling gamitin sa panahon ng halalan, tinuldukan ni PGen Marbil na lahat ay pawang mga haka-haka lamang.
“Walang makatotohanang batayan para sabihin na ang programang ito ay sinadya upang magtanim ng takot. Ilang taon na nating ipinapatupad ang Revitalized Katok. Walang agenda, walang political bias, at walang pananakot. Ang aming mga paalala ay puro legal at procedural, target lang yung mga may expired na lisensya ng baril,” paglilinaw pa ni PGen Marbil.
Ang PNP ay mananatiling neutral sa pulitika, at ang mahigpit na pagpapatupad ng regulasyon ukol sa baril ay isa sa mga hakbangin upang masiguro ang kaligtasan ng publiko. ###
Panulat ni Tintin
