Samar – Timbog ang isang construction worker sa isinagawang buy-bust operation ng PNP-PDEA 8 sa Brgy. Buenavista, San Jorge, Samar noong Huwebes, September 15, 2022.
Kinilala ni Police Captain Michael Ray G Canete, Chief of Police ng San Jorge Municipal Police Station ang naaresto na si alyas “Garong”, 25, residente ng Brgy. Burabod, Gandara, Samar at tinuturing na High Value Individual.
Ayon kay PCpt Canete, bandang 1:00 ng hapon ng masakote ang suspek ng pinagsanib na puwersa ng Samar Provincial Drug Enforcement Unit, Provincial Intelligence Unit, San Jorge MPS, Regional Intelligence Unit 8 at PDEA Regional Office 8.
Ayon pa kay PCpt Canete, dinakip ang suspek nang bentahan niya ng ilegal na droga ang isang pulis na nagpanggap na poseur buyer.
Kabilang sa narekober mula sa suspek ang dalawang sachets ng hinihinalang shabu at isang libong pisong marked money.
Nahaharap ang suspek sa kasong paglabag sa R.A. 9165 o Comprehensive Dangerous Drugs Act of 2002.
Patuloy naman ang Samar PNP sa pakikipag-ugnayan at pakikipagtulungan sa iba pang ahensyang nagpapatupad ng batas, mga yunit ng lokal na pamahalaan, at iba pang mga stakeholders upang masugpo ang paglaganap ng kalakalan ng ilegal na droga sa rehiyon.
Panulat ni Patrolwoman Rialyn B Valdez
