Davao de Oro – Matagumpay na naisagawa ang 50 metrong concrete pathway sa tulong ng Revitalized-Pulis sa Barangay para sa mga residente ng Purok 27, Sitio Puting Bato, Brgy. Ngan, Compostela, Davao de Oro mula Abril 21-28, 2022.
Ang pagtatayo ng nasabing Quick Impact Project ng R-PSB Puting Bato sa pangunguna ni PLt Ramil Anthony Maxey, Team Leader, ay bilang tugon sa kahilingan ng mga residente na maisaayos ang kanilang lubak-lubak na daan na talaga namang nagdudulot ng kahirapan at panganib sa mga residente at mga motorista sa nasabing Sitio.
Maging ang mga miyembro ng team ay personal na naranasan kung gaano kahirap lampasan ang nasabing bahagi ng kalsada na nagresulta ng ilan sa mga aksidente ng motorsiklo.
Dahil sa pagpupursige ng R-PSB team ay naging posible ang nasabing proyekto pagkatapos ng mahigit isang linggong bayanihan katuwang ang mga kalalakihan ng nasabing Sitio.
Layunin ng aktibidad na ito na mabigyan ng maayos na daanan ang mga mamamayan ng Sitio Puting Bato at maiwasan ang pagkakaroon ng mga aksidente sa motorsiklo lalong lalo na upang masolusyunan ang mga isyu kaugnay sa mga Communist Terrorist Group sa kanilang lugar.
###
Panulat ni Patrolwoman Rose Ann Delmita
