Tulong-tulong na isinagawa ng mga tauhan ng Talibon Municipal Police Station at Talibon Fire Station ang Community Outreach Program na ginanap sa Apolinario P Gurrea Elementary School, Brgy. San Jose, Talibon, Bohol nito lamang Martes, Agosto 29, 2023.
Ang aktibidad ay pinangunahan ng mga tauhan ng naturang istasyon sa pangangasiwa nina Police Captain Amelito Melloria, Chief of Police at Senior Inspector Aproniano C Torrejos ng Talibon Fire Station katuwang ang principal ng naturang paaralan na si Ginang Melinda M Ramos.
Nagsimula ang aktibidad mula sa isang diyalogo na pinangunahan ni PSSg Autentico, na nagbigay liwanag sa mga karapatan ng mga bata at nagsusulong ng mga hakbangin laban sa mga nagaganap na bullying sa mga paaralan.
Tampok sa naturang programa ang pamamahagi ng mga masustansyang meryenda, tulad ng spaghetti, sliced bread, at juice. Naghandog din ng mga bagong damit, pantalon, tsinelas at sandals sa mga piling estudyante na siyang sponsor ng U8 Consumer Goods Trading-Talibon.
Ang inisyatibong ito ay naglalayong pasiglahin ang mga positibong relasyon at magbigay ng mahahalagang aral sa mga mag-aaral at guro ng Apolinario P Gurrea Elementary School na siyang magbibigay ng mas maliwanag na kinabukasan para sa kabataang henerasyon.
