Marikina City – Matagumpay na nailunsad ang Opening Ceremony ng Chief PNP Cup 2023 sa ARMSCOR Shooting Range sa Marikina City nito lamang ika-17 ng Agosto 2023.
Ang aktibidad ay pinangunahan ng Hepe ng Pambansang Pulisya ng Pilipinas na si Police General Benjamin C Acorda, Jr., kasama ang PNP Command Group pati na ang iba pang matataas na opisyal, maging ang mga unipormado at hindi unipormadong indibidwal.
“Sa araw na ito, ipinakikita natin ang kakayahan na patuloy na manatili sa pag-aaspire sa kahusayan habang tayo’y lumalakad sa mga yugto ng laban sa pagkakamit ng tagumpay. Ito’y hindi lamang sa larangan ng palakasan, kundi pati na rin sa araw-araw nating misyon na magbigay proteksyon at serbisyo sa komunidad. Mahalaga na tayo’y magkaroon ng maayos na kaalaman sa paggamit ng mga standard na kagamitan ng pulisya, tulad ng baril. Ngunit huwag nating kalimutan, ito ay dapat gamitin bilang panghuli na pagpipilian kapag ang mga paraang hindi nakakasakit ay hindi sapat upang tayo at ang komunidad ay protektahan sa mga oras ng panganib. Gayundin, ang tournament na ito ay nagpapaalala sa atin ng kahalagahan ng pagkakaisa, kung paano tayo nagtutulungan sa larangan upang masigurong ligtas ang ating mga komunidad,” mensahe ng hepe.
Ang Chief PNP Cup 2023 ay isang natatanging pagkakataon hindi lamang para sa mga magagaling sa paggamit ng baril bagkus ito ay naglalaman din ng malalim na kahulugan.
Ito’y nagpapakita ng dedikasyon, kasanayan, at pagkakaisa sa pagitan ng mga miyembro ng PNP at ng mga mula sa pribadong sektor.
Sa bawat pagputok ng bala, buong tapang na ipinapakita ang pagkakaisa ng mga indibidwal sa layuning mapanatili ang kapayapaan at kaayusan ng bansa. Ipinapakita rin ng aktibidad ang kanilang pagnanais na patuloy na mag-ambag sa mas mataas na antas ng kaligtasan at serbisyo para sa komunidad.
