Umabot sa 1,000 kapulisan at force multipliers ang idineploy sa mga sementeryo sa Cebu City simula noong Lunes, Oktubre 28, 2024, bilang paghahanda sa Araw ng mga Santo at Araw ng mga Kaluluwa, sa Nobyembre 1 at 2, 2024.
Kabilang sa bilang ang mahigit 400 na kapulisan ng Cebu City Police Office, 300 miyembro ng Cebu City Disaster Risk Reduction and Management Office (CCDRRMO), Maritime Police, Armed Forces of the Philippines, Road Management Authority (RMA), Bureau of Fire Protection, at mga barangay tanod.
Ayon kay Police Colonel Antonietto Cañete, City Director ng Cebu City Police Office, kasalukuyang nakatutok ang security measures sa 23 sementeryo at tatlong pangunahing lokasyon sa lungsod.
Dagdag pa ni Police Colonel Cañete na sa Nobyembre 1 at 2, dagdagan pa nila ang bilang ng mga kapulisan sa mga sementeryo na aabot sa 2000 upang masigurado ang kaayusan at seguridad.
Samantala, ipapatupad ng pulisya ang paparating na executive order ni Cebu City Mayor Raymond Garcia na maglilimita sa pagbisita sa sementeryo hanggang alas-10 ng gabi.
Ipinagbabawal din sa loob ng sementeryo ang mga matatalas na sandata, mga inuming nakalalasing, at sound systems.
Puspusan ang pagbabantay at palaging nakaalerto ang kapulisan ng Cebu City upang masiguro ang maayos at tahimik na undas dahil sa Bagong Pilipinas, ang gusto ng pulis, ligtas ka!.
Source: CCPO
