Samar – Nakatanggap ang Catbalogan City Police Station ng tatlong unit ng mga bagong Police Patrol Cars mula sa Pamahalaang Lungsod ng Catbalogan nitong ika-30 ng Enero 2023.
Personal na tinurn-over ni Mayor Dexter Uy kay Police Lieutenant Colonel Dinvir Revita, Officer-In-Charge ng Catbalogan City Police Station kasabay sa isinagawang Monday Flag Raising Ceremony sa Catbalogan CPS Grounds, Brgy. 3, Catbalogan City, Samar.
Ang mga sasakyang ito ay karagdagang kagamitan sa mga operasyon sa pagpapatupad ng batas lalo na sa mga aktibidad ng ilegal na droga at sa paglaban ng kriminalidad sa lungsod, na naaayon sa Local Anti-Criminality Action Plan upang itaguyod ang kaayusan at kaligtasan ng publiko sa loob ng Lungsod ng Catbalogan.
Sa mensahe ni Mayor Uy, ang suporta ng LGU sa PNP ay makatutulong upang maging mapayapa ang lungsod lalo na kapag may mga programa at bisita.
Ipinaabot naman ni PLtCol Revita ang kanyang labis na pasasalamat sa LGU Catbalogan para sa kabutihang loob nito na bigyan ng ganitong suporta at pagtitiwala ang mga kapulisan.
