Police Regional Office 12 – Naging matagumpay ang isinagawang hot pursuit operation ng Midsayap Municipal Police Station laban sa isang carnapper sa bahagi ng Barangay Central Glad, Midsayap, Cotabato noong Oktubre 2, 2022.
Nangyari ang insidente nang iparada ng may-ari ang kanyang minamanehong motorsiklo sa tabi ng kalye at makalipas ang isang minuto ay napansin niyang nawawala ang motorsiklo at pinaniniwalaang ninakaw ng hindi pa nakikilalang tao.
Kaagad niyang ini-report ang insidente sa mga otoridad ng Midsayap MPS na nagresulta sa pagkakaaresto kay Mastura Ngorong Taiwan, 33, may asawa, walang trabaho, at residente ng Barangay Lorenzo, Balabagan, Lanao Del Sur.
Narekober sa suspek ang itim/pulang Bajaj 100 na motorsiklo, isang itim na sling bag, tatlong piraso ng heat-sealed sachet na naglalaman ng puting crystalline substance na pinaniniwalaang shabu na tumitimbang ng 0.10 gramo na may tinatayang halaga na Php2,500, Certificate of Registration (CR) at Official Receipt (OR), tatlong pirasong susi ng motorsiklo, isang smooth bored homemade pistol na may dalawang live ammunition, at isang brown wallet na naglalaman ng kanyang CCTS ID.
Ang mga nakuhang ebidensya ay itinurn-over sa kinauukulang yunit habang inihahain ang mga kasong Paglabag sa RA 10883 (New Anti-Carnapping Act of 2016) at Paglabag sa Section 11, RA 9165 at RA 10591.
“Ang agarang pagtugon sa mga reklamo nitong carnapping incident ay nakaangkla sa ating Serbisyo sa H.E.A.R.T. program at sa MKK = K o Malasakit, Kaayusan, Kapayapaan tungo sa Kaunlaran program ng ating Chief PNP. Ang PRO 12 ay mananatiling nakatuon na tumugon kaagad sa anumang uri ng kriminalidad upang ipakita ang ating MALASAKIT sa bawat tao sa SOCCSKSARGEN,” ani PBGen Jimili Macaraeg, Regional Director, PRO12.
Panulat ni Patrolman Gio Batungbacal
