Cagayan – Nakiisa ang Cagayan Police Provincial Office sa ilalim ng pamumuno ni Police Colonel Julio S Gorospe Jr., Officer-In-Charge, sa muling pag-arangkada ng Serbisyo Caravan na ginanap sa Barangay Casambalangan at Dungeg, Sta. Ana, Cagayan noong ika-6 ng Oktubre taong kasalukuyan.
Humigit kumulang 1000 residente ang naging benepisyaryo sa isinagawang serbisyo caravan sa dalawang barangay sa pagkakaisa nang iba’t ibang ahensya ng gobyerno.
Namahagi ang Cagayan PPO ng mga bagong pares ng tsinelas sa 100 na bata, 150 facemask sa mga matatandang dumalo sa aktibidad at pagsasagawa ng feeding program.
Maliban dito, ibinahagi din ng mga kapulisan ang mga programa ng organisasyon katulad ng libreng pabahay at Dugong Magiting o ang bloodletting activity.
Hinikayat din ng hanay ang mga residente na makipagtulungan sa mga programa at aktibidad ng PNP at ng pamahalaan upang mapanatili ang kaayusan at katahimikan ng kanilang bayan tungo sa mas maunlad na Sta. Ana, Cagayan.
Samantala, namahagi naman ang iba pang ahensya ng pamahalaan ng relief supplies; pakete ng iba’t ibang buto ng gulay; at mga bigas mula sa Provincial Government ng Cagayan.
Nagkaroon din ng libreng gupit, libreng blood pressure check-up; pamamahagi ng mga gamot at bitamina at pagbabakuna ng COVID-19 at boosters.
Kaugnay dito, ang iba pang ahensya ay ibinahagi din ang kani-kanilang programa at ang mga benepisyong maaaring matanggap ng bawat indibidwal mula sa kanilang hanay.
Layunin ng serbisyo caravan na mailapit at maihatid ang mga serbisyo at programa ng iba’t ibang ahensya ng pamahalaan sa mga malalayong lugar upang mawakasan ang suliranin sa insurhensya sa bansa.
Source: Cagayan Police Provincial Office
Panulat ni Police Corporal Carla Mae P Canapi
