Ligtas na nailikas ng isang Cagayano Cop katulong ang iba pang residente ang isang pamilya kabilang ang isang sanggol gamit ang isang improvised bangka nito lamang Lunes, Oktubre 31, 2022 sa Brgy. Annafunan East, Tuguegarao City, Cagayan.
Ayon sa Cagayan Police Provincial Office, humingi ng saklolo ang pamilya ni Joy Narag matapos ma-trap sa kanilang tahanan dahil sa mabilis na pagtaas ng tubig baha sa kanilang lugar.
Agad naman na rumesponde si Patrolman Ian Ley Devad na nakatalaga sa Cagayan Provincial Community Affairs and Development Unit (PCADU) kasama ng iba pang residente at gumawa sila ng isang improvised floater na gawa sa palanggana, plastic bottle, at kahoy upang magamit sa paglikas sa sanggol at ng buong pamilya kabilang ang dalawa pang bata.
Labis naman ang naging pasasalamat ng pamilya Narag sa mabilis na aksyon ng pulis at ng iba pang residente upang sila ay masaklolohan at ligtas na maitawid sa tubig baha.
Samantala, pinuri naman ni Police Colonel Julio Gorospe, Provincial Director ng Cagayan Police Provincial Office si Pat Devad sa kanyang kabayanihan at agarang pagresponde upang matulungan ang nabahang pamilya.
Binigyan-diin din niya ang kahalagahan ng pakikiisa ng mga mamamayan sa mga kapulisan upang mas mabilis na malagpasan ang bawat pagsubok na kakaharapin ng bayan.
Source: Cagayan PPO
Panulat ni Police Staff Sergeant Mary Joy D Reyes
