Sugatan ang isang drug personality matapos magkaroon ng armadong labanan sa isinagawang buy-bust operation ng Sta. Ana PNP sa Sitio Coreas, Barangay Cortes Garcia, Agdao, Davao City nito lamang ika-24 ng Marso, 2024.
Kinilala ni Police Lieutenant Colonel Ronald L Lao, Sta. Ana Police Station, ang suspek na si alyas “Ime”, 45 anyos at residente ng nasabing lugar.
Ayon kay PCol Lao, ang operasyon ay isinagawa ng mga tauhan ng Sta. Ana Police Station katuwang ang PDEA na nagresulta sa armadong labanan na naging dahilan ng pagtamo ng sugat ng suspek.
Ayon pa kay PCol Lao, narekober mula sa suspek ang 12 na pakete ng hinihinalang shabu na may bigat na humigit kumulang 53.79 gramo at may Standard Drug Price na Php365,772 at .38 revolver na walang serial number.
Agad namang isinugod ang suspek sa Southern Philippines Medical Center upang makatanggap ng lunas at kasalukuyan namang inaabangan ng nasabing istasyon ang DCFU 11 para sa parallel investigation sa lugar ng insidente.
Samantala, ang laban kontra kriminalidad ay patuloy na pinapaigting ng Police Regional Office 11 sa pamumuno ni Regional Director Police Brigadier General Alden B Delvo alinsunod sa kampanya ng Bagong Pilipinas na panatilihin ang kapayapaan at kaayusan tungo sa pagsulong ng bansa.
Panulat ni Pat Shairra Rose A Aquino
