Lebak, Sultan Kudarat – Tinulungan ng dalawang babaeng pulis sa pamamagitan ng agarang pagdodonate ng dugo sa isang buntis sa Castillon-Gaurana General Hospital, Lebak, Sultan Kudarat, noong Agosto 20, 2022.
Kinilala ang buntis na si Jessica Timway, 22, estudyante at residente ng Brgy. Salaman, Lebak, Sultan Kudarat.
Napag-alaman ding anim na buwan na itong buntis ngunit isinugod ito sa Castillon-Gaurana General Hospital dahil sa mababang hemoglobin nito. Kaya’t agad na lumapit ang magulang nito sa Lebak Municipal Police Station para humingi ng tulong.
Ayon kay PLtCol Julius Malcontento, Hepe ng Lebak MPS boluntaryong nagdonate ng tig-isang bag ng dugo sina Patrolwoman Phila Mae Astrolabio at Patrolwoman Rolyn Bannawag upang mapunan ang dalawang bag na dugo na kinakailangan ni Jessica.
Laking pasalamat naman ng pamilya ni Jessica sa dalawang pulis na nakatalaga sa nasabing istasyon dahil hindi na nila kailangang magbayad at bumiyahe pa papuntang Cotabato City para bumili ng dugo.
Ang mababang hemoglobin sa pagbubuntis ay maaaring maganap ano mang oras at maging sanhi ng panganib at komplikasyon hindi lamang pagbubuntis kundi pati na rin sa panganganak.
###
Panulat ni Patrolman Khnerwin Jay A Medelin
