Sa pagnanais na maitaas ang kamalayan at isulong ang maagang pagtuklas sa Breast Cancer, ang mga kababaihang PNP ng Police Regional Office MIMAROPA ay aktibong nakilahok sa isang araw na talakayan hinggil sa Breast Cancer Awareness bilang bahagi ng 2024 National Women’s Month Celebration na ginanap sa Hinirang Hall, RHQ Building, Camp BGen Efigenio C Navarro, Barangay Suqui, Calapan City, Oriental Mindoro, nito lamang Marso 19, 2024.
May kabuuang 50 kababaihan ang dumalo mula sa iba’t ibang unit, kabilang ang Regional Headquarters, Calapan City Police Station, Technical Support Unit, at Regional Support Units bilang paggunita sa 2024 National Women’s Month na may temang, “Lipunang Patas sa Bagong Pilipinas; Kakayahan ng Kababaihan, patutunayan!”.
Kabilang sa mga itinampok sa naturang aktibidad ang pagbibigay kaalaman ng mga ekspertong medikal, na kinabibilangan ng Konsulta Overview ni Dr. Patricia P. Caballero, MD, MHA CPC-FM, Medical Specialist, Oriental Mindoro Provincial Hospital (OMPH); ang Breast Cancer Awareness lecture ni Dr. Ronalyn Lyra Umali, MD, Medical Specialist-Surgery; at ang Uterine and Ovarian Cancer Awareness lecture ni Dr. Mara Estrella Goco, Ylaya, MD, OBGYNE, Specialists, OMPH.
Ang pagsasagawa ng talakayang ito ay bahagi ng pagpapatibay ng suporta sa mga kababaihan sa pamamagitan ng pagpapataas ng kamalayan at pagbibigay halaga sa aspeto ng pangkalusugan sa mga babaeng tauhan ng PNP.
Panulat ni Patrolwoman Ana Rose D Guadaña
