Cebu City – Timbog ang 19-anyos na binatilyo sa Cebu City matapos mahulihan ng nasa mahigit Php5.6 milyong halaga ng hinihinalang shabu sa inilunsad na buy-bust operation ng mga operatiba ng Cebu City PNP sa Romano Cemetery, Barangay Carreta, Cebu City noong Miyerkules, Marso 29, 2023.
Kinilala ni Police Colonel Ireneo Dalogdog, City Director ng Cebu City Police Office, ang suspek na si “John Henry”, residente ng Sitio Samayo, Barangay Lorega, Cebu City.
Ayon kay PCol Dalogdog, bandang 11:30 ng umaga ng ikasa ng mga operatiba ng City Drug Enforcement Unit ng Cebu City PNP ang operasyon na humantong sa pagkakaaresto ng suspek at pagkakasamsam ng nasa 835 gramo ng hinihinalang shabu na may tinatayang halaga na Php5,678,000 at buy-bust money.
Kasong paglabag sa RA 9165 o ang Comprehensive Dangerous Drugs Act of 2002 ang kakaharapin ng suspek.
Patuloy naman na pinapaigting ng buong hanay ng Cebu City Police Station ang kampanya kontra ilegal na droga para sa pag-unlad at pagkamit ng isang maayos, ligtas at mapayapa na pamayanan.
