Solana, Cagayan – Timbog ang isang binata sa isinagawang buy-bust operation ng Cagayan PNP nito lamang Lunes, Agosto 8, 2022.
Kinilala ni Police Colonel Renell R Sabaldica, Provincial Director ng Cagayan Police Provincial Office, ang suspek na si Alyas Leo, 30, binata, at residente ng Brgy. Centro Southeast, Solana, Cagayan.
Ayon kay PCol Sabaldica, hinuli ang suspek bandang 7:20 ng gabi sa Purok 5, Brgy. Lingu, Solana, Cagayan ng mga tauhan ng Cagayan Provincial Intelligence Unit at Solana Police Station matapos itong magbenta ng isang Caliber 38 revolver na may serial number 1103433 at may kasamang anim na bala sa isang pulis na nagpanggap na poseur buyer.
Samantala, nakuha naman mula sa pag-iingat ng suspek ang dalawang android cellular phone at ang buy-bust money.
Nahaharap si Alyas Leo sa kasong paglabag sa Republic Act 10591 o ang Comprehensive Firearms and Ammunition Regulation Act.
Siniguro naman ni PCol Sabaldica na patuloy ang Cagayano Cops sa kanilang mga aktibidad at isinasagawang programa laban sa ilegal na baril at kriminalidad upang masiguro ang isang ligtas, tahimik, at payapang Cagayan.
Source: Solana Police Station
###
Panulat ni Police Staff Sergeant Mary Joy D Reyes
