Nakumpiska ang baril, mga bala, at shabu sa isinagawang search warrant operation ng mga awtoridad sa Purok 5, Barangay Laguilayan, Isulan, Sultan Kudarat nito lamang Marso 31, 2025.
Kinilala ni Police Lieutenant Colonel Julius R. Malcontento, Hepe ng Isulan Municipal Police Station, ang suspek na si alyas “Rambo”, 39 anyos, magsasaka at residente ng nasabing lugar.
Nagsagawa ng search warrant operation ang mga tauhan ng Isulan Municipal Police Station kasama ang mga personahe ng Police Regional Office 12.
Nasabat sa pamamahay ng suspek ang tatlong piraso ng steel magazine para sa M16, dalawang bala ng 9mm, tatlong bala ng caliber 357, limang bala ng cal. 45, isang homemade Uzi 9mm automatic pistol na may serial number, isang magazine para sa Uzi pistol, limang bala ng 9mm at apat na piraso ng hinihinalaang shabu na may kabuuang bigat na limang gramo at nagkakahalaga ng Php34,000.
Nahaharap ang suspek sa kasong paglabag sa Republic Act 10591 o “Comprehensive Firearms and Ammunition Regulation Act” at RA 9165 o “Comprehensive Dangerous Drugs Act of 2002”.
Tiniyak naman ng Isulan PNP ang kampanya laban sa lahat ng uri ng kriminalidad at ilegal na droga upang mapanatili ang kaayusan at kapayapaan sa rehiyon.
