Arestado ang isang lalaki matapos mahulihan ng iligal na droga at baril sa isang anti-carnapping checkpoint sa Crossing Makar, Barangay Labangal, General Santos City noong Pebrero 24, 2025.
Kinilala ni Police Colonel Nicomedes P Olaivar Jr., City Director ng General Santos City Police Office, ang suspek na si alyas “Bernardino”, 28 anyos, residente ng Barangay Fatima, General Santos City.
Bandang 4:00 ng hapon, pinara ang suspek ng mga operatiba ng General Santos City Highway Patrol Team dahil sa kawalan ng helmet at side mirror sa kanyang motorsiklo.
Sa halip na sumunod, iniwan ang motorsiklo, itinapon ang baril, at tumakbo ngunit agad siyang nadakip ng mga pulis.
Sa isinagawang body search, nakuha mula sa kanyang itim na sling bag ang tatlong sachets ng pinaghihinalaang shabu na may timbang na isang (1) gramo na may Standard Drug Price na Php6,800.
Mahaharap ang suspek sa kasong paglabag sa Republic Act 10591 o “Comprehensive Firearms and Ammunition Regulation Act” kaugnay sa Election Gun Ban at kasong may kinalaman sa iligal na droga.
Muling pinaalalahanan ng pulisya ang publiko na sumunod sa mga itinakdang checkpoint bilang bahagi ng kampanya laban sa krimen at iligal na droga. Ipinatutupad din ang COMELEC Gun Ban bilang paghahanda sa nalalapit na halalan. Ang sinumang mahuhuling may dalang baril nang walang kaukulang dokumento ay agad na aarestuhin at sasampahan ng kaso.
