Taguig City – Arestado ang limang drug suspek sa isinagawang Oplan Galugad ng mga tauhan ng Taguig City Police Station kung saan nakumpiska sa kanila ang Php112,000 halaga ng shabu nito lamang Sabado, Abril 29, 2023.
Kinilala ni Police Brigadier General Kirby John Kraft, District Director ng Southern Police District, ang mga suspek na sina Arturo Marron, 36; Nathaniel Piang, 35; Troy Minandang, 38; Mauhreen Andrade, 21; at Annuar Gana, 47.
Ayon kay PBGen Kraft, naganap ang operasyon ng Western Bicutan Police Substation 2, bandang alas-3:30 ng madaling araw sa Purok 7, PNR Site, Brgy. Western Bicutan, Taguig City kung saan naabutan nila ang limang suspek na nagsasagawa ng pot session kaya agarang inaresto ang mga ito.
Ayon pa kay PBGen Kraft, napag-alaman din na ang isa sa mga suspek na si Annuar Gana, ang responsable sa magkakasunod na insidente ng pamamaril sa PNR Site, Brgy. Western Bicutan, Taguig City.
Nasamsam sa mga suspek ang apat na heat-sealed at isang bukas na transparent plastic sachet na naglalaman ng pinaniniwalaang shabu na tumitimbang ng humigit-kumulang sa 16.5 gramo at nagkakahalaga ng Php112,200; isang aluminum strip foil; isang aluminum rolled foil; dalawang lighter; isang cal. 45 pistol na may kasamang isang magazine at tatlong live ammunition; isang hand grenade; at isang leather belt bag.
Mahaharap ang mga suspek sa R.A. 9165 o Comprehensive Dangerous Drug Act of 2002, at R.A. 10591 o Comprehensive Firearms and Ammunition Regulation Act, at R.A. 9516 o Illegal possession of explosives.
Hinihikayat ng Pambansang Pulisya ang bawat mamamayan na isuplong ang mga indibidwal na patuloy na gumagamit ng ilegal na droga upang masupil at managot sa kanilang pagkakasala.
Source: SPD PIO
Panulat ni PSSg Remelin M Gargantos
