Nakumpiska sa isang lalaking tricycle driver ang ilang hindi lisensyadong baril at bala matapos salakayin ng mga awtoridad ang bahay nito sa Brgy. Putatan, Muntinlupa City nito lamang Lunes, Enero 29, 2024.
Kinilala ni PBGen Mark Pespes, District Director ng Southern Police District, ang suspek na si alyas “Casio”, 55 taong gulang, at isang tricycle driver.
Nahuli ang suspek sa pinagsanib pwersa ng mga tauhan mula sa Station Intelligence Section, Putatan Sub-station, SIDMS, at SWAT ng Muntinlupa CPS.
Nakumpiska ang isang Sentry special CTG, caliber 38 revolver na may serial no. R94VF008, na may anim na live ammunition, isang Replica (Beretta 9mm) na may magazine, isang Armino caliber .22 revolver, isang Improvised Shotgun na may limang live ammunition, isang Caliber .22 rifle na may isang magazine at limang live ammunition at isang brown belt bag.
Nahaharap ang suspek sa kasong paglabag sa RA 10591 o Comprehensive Firearms and Ammunition Regulation Act.
“Patuloy naming pinalalakas ang aming agresibong pagsisikap na masamsam at mabawi ang mga unlicensed firearms sa pamamagitan ng patuloy na operasyon ng pulisya at pagpapatupad ng mga search warrant laban sa mga ilegal na nagmamay-ari ng baril. Isang pagpupugay sa masisipag na tauhan ng Muntinlupa City Police Station”, ani PBGen Pespes.
Source: SPD PIO
Panulat ni PSSg Remelin M Gargantos
