Jordan, Guimaras – Walang buhay at may tama sa ulo ang isang lalake na natagpuan sa harap ng isang tindahan sa Jordan, Guimaras nitong Martes, Mayo 10, 2022.
Kinilala ni Police Major John Van Herson Luspo, Officer-in-Charge ng Jordan Municipal Police Station ang biktima na si John Adrian Talaman y Estember, 25, walang asawa at residente ng Sitio Bitbit, Sta. Teresa, Jordan, Guimaras.
Ayon kay Police Major Luspo, nakatanggap sila ng tawag na may isang bangkay na natagpuan sa harap ng Sharnel Sari-Sari Store sa Old Site, Brgy. San Miguel ng parehong bayan.
Agad namang rumesponde ang mga kapulisan sa nasabing lugar at natagpuan ang biktima na nakahandusay at wala ng buhay, may sugat sa ulo dulot ng isang matigas na bagay.
Positibo namang kinilala ang biktima ng kanyang ama at kapatid na sina Noe Talaman at John Talaman.
Ang naturang bangkay ay sasailalim sa autopsy upang matukoy ang dahilan ng pagkamatay nito habang patuloy naman ang kapulisan sa pagsisiyasat sa motibo ng pagpatay at sa pagkakakilanlan ng maaaring mga salarin nito.
###
