Siquijor – Iginawad sa isang pamilya ang Balay Mo, Gasa Ko Project ng mga tauhan ng Siquijor Police Provincial Office sa Barangay Camogao, Enrique Villanueva, Siquijor nito lamang Mayo 30, 2023.
Ang nasabing aktibidad ay pinangunahan ng Provincial Director ng Siquijor Police Provincial Office na si Police Colonel Robert Lingbawan, na siyang pormal na dinaluhan ni Municipal Mayor Hon. Nale Vincent Masayon.
Ang pagbebendisyon ng naturang bahay ay pinangunahan ni Msgr. Candelario Catubig, kung saan dinaluhan din ng mga miyembro ng BFP, Philippine Coast Guard, Municipal Advisory Group (MAG) sa pangunguna ni Ms Maria Cecilia Daganta, Stakeholders, Barangay Officials, Lingkod Bayan Advocacy Support Groups na pinangunahan ni Pastor Jun Sebial, Value Life Coach.
Ayon kay Police Colonel Lingbawan, naging benepisyaryo ang pamilya ni Nanay Rizalita Sugabo Bandoquillo na nakatira lamang sa isang maliit na barung-barong na maaaring tuluyang masira sa paparating na bagyo.
Naging emosyonal si Nanay Rizalita sa kanyang mensahe kung saan pinasalamatan niya ang Siquijodnon Pulis, LGU, Sponsors at Stakeholders sa kanilang hindi matatawarang tulong para sa kanyang pamilya.
Naisakatuparan ang “Balay Mo, Gasa Ko Project” bilang parte ng adbokasiya ng kasalukuyang Provincial Director, Police Colonel Lingbawan para makapamahagi ng bagong tahanan sa mga mamamayan na higit na nangangailangan sa tulong ng iba’t ibang ahensya ng pamahalaan.
