General Santos City — Ipinagdiwang sa Police Regional Office 12 sa pangunguna ni Regional Director, PBGen Jimili Macaraeg ang ika-125 Araw ng Kalayaan na ginanap sa PRO 12 Grandstand, Tambler, General Santos City nitong Lunes ng umaga, Hunyo 12, 2023.
Kabilang sa mga naging aktibidad ay ang pag-aalay ng bulaklak sa monumento ng mga bayani sa PRO 12 Heroes Memorial Park.
Kaagad namang sinundan ng Traditional Monday Flag Raising Ceremony kung saan sabay-sabay na nagbigay ng pinakamatikas na pagpupugay ang kapulisan ng PRO 12 sa pambansang watawat na sumisimbolo sa paglilingkod at sakripisyo ng mga bayani ng ating bansa na lumaban para sa ating kalayaan.
Samantala, walong matitikas na kapulisan ng PRO 12 naman ang ginawaran ng PNP Medal of Merit para sa kanilang pagpapakita ng katangi-tanging paglilingkod sa bayan at sa matagumpay na pagkakadakip sa Top 4 Regional Most Wanted Person.
Bilang simbolo ng kalayaan pinangunahan rin ng mga opisyales ng PRO 12 ang pagpapalipad ng mga puting kalapati.
Ang Araw ng Kalayaan ay taunang ginugunita sa Pilipinas na ginaganap tuwing Hunyo 12 bilang pag-alala ng Pamamahayag ng Kalayaan ng Pilipinas mula sa Espanya noong Hunyo 12, 1898 at isa itong Pambansang Araw ng pagdiriwang sa Pilipinas.
Source : Police Regional Office 12 – Public Information Office
Panulat ni Patrolman Khnerwin Jay A Medelin
