Tuluyan nang napasakamay ng mga otoridad si Pastor Apollo Quiboloy; ito ay kinumpirma ni SILG Benjamin Abalos sa kaniyang facebook post nito lamang gabi ng Setyember 8, 2024.
Sinegundahan naman ito ni PBGen Nicolas Torre III, Regional Director, PRO 11, sa isang pahayag kung saan pinasalamatan pa niya ang mga miyembro ng pambansang pulisya at mga kababayan na nakipagtulungan upang madakip ang pastor.
Pinuri din niya ang lahat ng mga kapulisan na hindi nagpatinag at nanatiling matatag sa loob ng halos dalawang linggong operasyon sa mismong KOJC compound.
Matatandaang nagtago si Quiboloy nang halos anim na buwan matapos itong labasan ng arrest order ng senado dahil sa hindi nito pagsipot sa isang hearing.
Bagama’t hindi pa malinaw ang detalye kaugnay sa pagkahuli ni Quiboloy, hinikayat naman ni PBGen Torre ang publiko na pakaabangan ang press briefing bukas kasama si SILG Abalos para sa buo at kompletong mga impormasyon.
