Arestado ang apat na indibidwal na sangkot sa isang online scam sa isinagawang entrapment operation ng Nueva Ecija PNP sa Barangay Burnay, Talavera, Nueva Ecija nito lamang madaling-araw ng Enero 19, 2025.
Ayon kay Police Colonel Ferdinand D. Germino, Provincial Director ng Nueva Ecija Police Provincial Office, ang biktima ay kinilalang si alyas “Renz”, 32, co-owner ng G-Racing habang ang mga naarestong suspek ay isang babae at tatlong lalaki na pawang mga residente ng Barangay Burnay at San Pascual.
Samantala, ang pangunahing suspek, na isang 24-anyos na lalaki at utak ng panloloko, ay nakatakas at kasalukuyang tinutugis ng pulisya.
Batay sa imbestigasyon, umorder ang suspek ng Php809,500 halaga ng mga piyesa ng motorsiklo at nagpadala ng pekeng online transaction slip bilang patunay ng bayad.
Dahil nagtiwala sa dokumento, agad na ipinadala ng biktima ang mga piyesa sa pamamagitan ng isang Lalamove driver.
Kalaunan, natuklasan ng biktima na walang aktwal na bayad ang transaksyon, kaya agad itong humingi ng tulong sa Talavera Police Station.
Sa mabilis na aksyon ng mga awtoridad, agad na inilatag ang entrapment operation, na nagresulta sa pagkakaaresto ng apat na suspek.
Ang mga nahuling suspek ay nahaharap sa kasong Syndicated Estafa na walang inirekomendang piyansa.
Patuloy ang Nueva Ecija PNP sa pagpapalakas ng kampanya laban sa kriminalidad upang masiguro ang kaligtasan at kaayusan sa buong lalawigan.
Panulat ni Pat Jilly A Peña
