Kalaboso ang tatlong lalaki at isang babae matapos mahuli sa ikinasang drug buy-bust operation ng Iloilo City Police Station 3 sa Brgy. Taytay Zone 2, Jaro, Iloilo City, bandang 11:30 ng gabi ng ika-28 ng Nobyembre 2023.
Kinilala ni Police Major Eduardo Siacon Jr., Station Commander ng Iloilo City Police Station 3, ang mga suspek na sina aka “Sweet”, aka “Joseph”, aka “Spencer”, at aka “Edeboy”, pawang mga naitala bilang mga Newly Identified Street Level Individual drug personality.
Nakumpiska sa mga suspek ang anim na pakete ng pinaghihinalaang shabu kabilang ang buy-bust item na may tinatayang timbang na 25 gramo na nagkakahalaga ng Php170,000.
Bukod sa droga, nabawi sa mga suspek ang Php15,000 na ginamit bilang buy-bust money, kasama ang isang subscribed 100-peso bill, at ilang mga non-drug items.
Nahaharap ang mga suspek sa kasong paglabag sa Republic Act 9165 o Comprehensive Dangerous Drugs Act of 2002.
Ang pagkadakip sa mga suspek ay isang implikasyon na mahigpit na ipinapatupad ng Iloilo City PNP ang kampanya kontra ilegal na droga, upang matiyak ang kaayusan at katahimikan sa syudad.
